ដើម្បីសុភមង្គលគ្រួសារ

ការធ្វើឲ្យគ្រួសារ មានសុភមង្គល គឺជាភារកិច្ចរបស់សមាជិកគ្រួសារទាំងមូល ក្នុងនោះមានប្ដីប្រពន្ធឪពុកម្ដាយ និងកូន។ តើស្វាមីភរិយាត្រូវប្រតិបត្តិដូចម្ដេចខ្លះ? ដើម្បីគ្រួសារមានសុភមង្គល?
ជាដំបូងស្វាមីនិងភរិយាត្រូវអនុវត្តក្នុងគ្រួសារនូវកាតព្វកិច្ច ៥ប្រការរបស់ព្រះពុទ្ធឱវាទគឺ

ទី១ ត្រូវមានចិត្តស្មោះត្រង់ចំពោះស្វាមីភរិយាមិនមានអ្វីជា អាថ៌កំបាំង មិនត្រូវមានចិត្តផិត ក្បត់ មើលឃើញអ្នកដទៃល្អជាងគូរបស់ខ្លួន។

ទី២ ត្រូវមានការគោរពចំពោះស្វាមីភរិយាត្រូវស្វែងយល់ពីគ្នាថាតើ គូរបស់យើងមានចំណង់ ចំណូលចិត្តបែប ណាមិនត្រូវជំទាស់ឬតម្រូវឲ្យគេធ្វើដូចខ្លួនទេ ត្រូវមានចិត្តអត់ធ្មត់មានការអប់រំគ្នាទៅវិញទៅមក។

ទី៣ ត្រូវលើកស្ទួយកិត្តិយសស្វាមី ភរិយាមិនត្រូវបន្តុះបង្អាប់គ្នា ទី៤ មិនត្រូវ មាក់ងាយស្វាមី ភរិយាទុកដូចទាសាទាសី ទី៥ ត្រូវរកគ្រឿងអលង្ការ ទ្រព្យសម្បត្តិឲ្យស្វាមី ភរិយាទុកដាក់ សំលៀកបំពាក់សមរម្យ។

ចំពោះ ឪពុកម្ដាយត្រូវមានកាតព្វកិច្ចដូចម្ដេចខ្លះដើម្បីឲ្យមានសុភមង្គល ក្នុងគ្រួសារ?

ទី១ ត្រូវមានការថែទាំកូនកុំឲ្យមានជំងឺដង្កាត់ឲ្យមានសុខភាព មាំទាំ

ទី២ ត្រូវឲ្យកូនទៅរៀនទាំងស្រីទាំងប្រុសកុំឲ្យល្ងង់ខ្លៅ

ទី៣ ត្រូវមានការយកចិត្តទុកដាក់ស្រឡាញ់អប់រំកូនប្រដៅឲ្យកូនដើរផ្លូវ ល្អ

ទី៤ ទុកដាក់ឲ្យកូនមានគូស្រករទី៥ចែកទ្រព្យសម្បត្តិឲ្យកូនក្នុងពេលវេលា ដែលសមគួរ។

ចំពោះកូនវិញ តើត្រូវមានកាតព្វកិច្ចដូចម្ដេចដើម្បីឲ្យគ្រួសារមានសុភមង្គល? គឺកូនត្រូវបំពេញនូវកាតព្វកិច្ច៥ប្រការដែរ។

ទី១ ត្រូវមានការថែទាំខ្លួនកុំឲ្យឆ្លងជំងឺផ្សេងៗ

ទី២ ត្រូវខិតខំរៀនសូត្រ

ទី៣ ត្រូវដើរផ្លូវល្អកុំធ្វើចោរ

ទី៤ មានចិត្តកតញ្ញូដឹងគុណឪពុកម្ដាយ

ទី៥ ត្រូវថែទាំទ្រព្យសម្បត្តីដែលឪពុកម្តាយចែកឲ្យ។

នៅមានកត្តាជាច្រើនទៀត ដើម្បីថែរក្សាគ្រួសារឲ្យមានសុភមង្គល ដូចជាការថែទាំសេចក្ដីស្រឡាញ់ឲ្យមានជារៀងរហូត គឺធ្លាប់ស្រឡាញ់គ្នាបែបណាពេលមុនរៀបការឬទើបរៀបការរួចត្រូវ ធ្វើឲ្យដូចមុន។ ត្រូវឧស្សាហ៍សួរសុខទុក្ខគ្នាយកចិត្តគ្នា កុំបង្កើតភាព ធុញទ្រាន់ដូចជាការនិយាយដដែលៗ ។ មិនត្រូវប្រចណ្ឌខុសរបៀប មិនត្រូវបិទសិទ្ធិសេរីភាពគ្នា។ត្រូវបំពេញសេចក្ដីត្រូវការឲ្យ គ្នាទៅវិញទៅមក។

ជាធម្មតាគូស្វាមីភរិយា រស់នៅជាមួយគ្នាយូរទៅតែងមានចិត្តធុញទ្រាន់ បើចូលដល់របៀបនេះតើត្រូវធ្វើបែប ណា? គឺគូស្វាមីភរិយាត្រូវផ្លាស់ប្ដូរបរិយាកាសទាំងបន្ទប់គេង ការរៀបចំផ្ទះសំបែងឲ្យខុសប្លែក នាំគ្នាចេញដើរកម្សាន្តទីកន្លែងប្លែកៗ។ កត្តាដែលអាចធ្វើបានដែលល្អបំផុតនោះគឺ បើអាចបំបែកគ្នាមួយរយៈ ដូចជាការចេញទៅបំពេញបេសកកម្មឬទៅរកស៊ី ឬទៅដើរកម្សាន្តរៀងខ្លួននៅក្រៅស្រុក មួយខែឬ២ខែ ។

នៅមានការបំពេញជាច្រើនទៀតប៉ុន្តែខ្ញុំសូមសង្ខេបយ៉ាងវែងប៉ុណ្ណេះចុះ។
សូមអរគុណនូវការអានរបស់លោកអ្នក។