ស្នេហា៤ប្រភេទ

ស្នេហាដែលកើតចេញពីមនុស្សផ្សេងគ្នា នឹងតែងតែមានចរិតដោយឡែកពីគ្នា ។ ជួនកាលវាត្រូវ បានគេប្រដូចទៅនឹងខ្យល់ត្រជាក់ក្នុងរាត្រីក្តៅ ពេលខ្លះជាខ្យល់ក្តៅ ធ្វើឲ្យអ្នកទាំងពីរមាន​អារម្មណ៍​ ឆាបឆេះ ហើយពេលខ្លះទៀតដូចជាទ្រនំសុខសាន្ត…..។ បើទោះជា អ្នកកំពុងតែស្រលាញ់ បែបណា ក៏ដោយអ្នកវិទ្យាសាស្ត្រ នៅតែអាចបែងចែកស្នេហាជាប្រភេទជាមូលដ្ឋាន ដូចខាងក្រោម៖

–ស្នេហាជាមួយនឹងអារម្មណ៍ខ្លាំងក្លាៈ

មនុស្សមួយចំនួនមានចិត្តត្រេកត្រអាលជាមួយនឹង ប្រភេទស្នេហាដែលមានភាព ពេញចិត្តពេញថ្លើមច្រើននិងស្និទ្ធស្នាល រួមជាមួយអារម្មណ៍រំជើបរំជួលខ្លាំងក្លា។ នេះត្រូវបានគេមើលឃើញ​ថា ជាមនោសញ្ចេតនា ដែលមានការរួមផ្សំ នៃផ្លូវភេទ និងអារម្មណ៍ រំជើបរំជួលពេញទំហឹង ។ បណ្តាមនុស្សដែលធ្លាប់ឆ្លងកាត់ស្នេហានេះ គឺចង់បានភាពជិតស្និទ្ធ ផ្នែករាងកាយ និង​ស្មារតី​ជាមួយដៃគូ និងមានទំនោរធ្វើឲ្យស្នេហាកាន់តែអស្ចារ្យ ។ ភាពពេញដោយ រ៉ូម៉ែនទិក ពេញចិត្តពេញថ្លើម បង្កឲ្យមាន អារម្មណ៍ជ្រួលជ្រើមក្នុង ពេលចាប់ផ្តើមនោះ ជា​ចំណុច​ពិសេស​របស់មនុស្សដែលចូលចិត្តមានស្នេហាប្រភេទ។

–ស្នេហាដែលកើតឡើងបន្តិចម្តងៗ

ប្រភេទមនោសញ្ចេតនា ដែលកើតមានឡើងជាជំហានៗ បែបនេះ នឹងធ្វើឲ្យអ្នកបានដឹង ពីភាគីម្ខាងទៀតថា តើស័ក្តិសមនឹងខ្លួន ឬទេមុននឹងឈានដល់អារម្មណ៍ខ្លាំងក្លា ។ មនុស្សដែលមានស្នេហា ប្រភេទនេះ តែងចង់បានភាពស្មោះត្រង់និង រីកចម្រើនបែប “តក់ៗពេញបំពង់” នៅតាមពេលវេលា។ ជាក់ស្តែងស្នេហាប្រភេទនេះ តែងកើតចេញពី បណ្តាមិត្តភក្តិជិតស្និទ្ធ ។

–ស្នេហាឧត្តម

មូលដ្ឋានស្នេហាប្រភេទនេះ គឺការអធ្យាស្រ័យ ស្រលាញ់រាប់អាន។ ពួកគេតែងចង់បាន ថែទាំមនុស្ស ដែលខ្លួនស្រលាញ់ ដូចជាថែរក្សាកូនក្មេង ឬឪពុករបស់ពួកគេ ដូចច្នេះដែរ។ ស្នេហា​ប្រភេទនេះ​ គឺពោរពេញទៅដោយភាពអស់ពីចិត្តពីថ្លើម ហ្មត់ចត់ ការស្រលាញ់និងមេត្តាធម៌ ព្រមទាំងឧត្តមគតិផងដែរ ។

–ស្នេហាបែបហេតុផល

នៅក្នុងក្តីស្នេហាប្រភេទហេតុផលនេះ គឺគ្មានភាពខ្ពង់ខ្ពស់នោះទេ ជំនួសវិញគឺមានតែការ ក្រើនរំឮក ពិចារណាថា តើគួរធ្វើតាមសំណូមពរភាគី ម្ខាងទៀត ឬអត់ ?

យោង​តាម​ការសន្យា និងការដឹងច្បាស់ពីបណ្តាតម្រូវការទាំងនោះ គឺនិងមានជីវិតយូរជាងស្នេហា ប្រភេទរ៉ូម៉ែនទិក ឬក៏អាចរហូតដល់ស្លាប់រៀងខ្លួនទៀតផង ។

ស្នេហាបែបហេតុផលតែងតែស្មោះត្រង់ និងជាក់លាក់។ បណ្តាមនុស្ស ដែលមានស្នេហា ប្រភេទនេះតែងមើលមនុស្ស ដែលខ្លួនស្រលាញ់ ក្នុងផ្លូវល្អជានិច្ច។ ពួកគេមិនចេះភ័យខ្លាចពី​ការប្រែប្រួល​ ព្រោះយល់ថា នេះគឺជាឱកាស និងឧបសគ្គរឹតតែ ជួយឲ្យពួកគេបានស្និទ្ធស្នាល និងយល់ចិត្តគ្នាជាមុន ៕